A team fae aa ower e UK includin Heriot-Watt University resairchers is creatin innovative ‘hearin glesses’ aat pit egither lip-readin technology, airtificial intelligence (AI), an clood computin for tae improve foo fowk wi hearin loss hear spik in noisy environments. E project, cryed COG-MHEAR an funded by the Engineerin an Physical Sciences Research Cooncil, is led by Edinburgh Napier University.
E device eeses a sma camera on glesses tae track a spikker’s lip muivements. Audio an visual data are sent via 5G tae a clood server, far AI separates e spikker’s vyce fae backgrund noise. E enhanced soond is then streamed back til e eeser’s hearin aid or heidphones near-haund.
Professor Mathini Sellathurai fae Heriot-Watt, co-leadin e wireless 5G-clood noise-cleanin aspect, said: “We’re nae tryin tae reinvent hearin aids. We’re tryin tae gie them superpouers. Ye simply pynt the camera or leuk at e person ye waant tae hear. Even if twa fowk are spikkin at eence, e AI eeses visual cues tae pill oot e vyce o the person ye’re leukin at.”
E nyow hearin aids aften fecht in lood places like cafés or stations acause o limited processin pouer. By shiftin hivvy computin tae clood servers, e team can apply advanced deep-lairnin algorithms ithoot burdenin e wearable device.
Mair nor 1.2 million adults in e UK hae significant hearin loss, makkin ilka day conversations difficult. Iss nyow technology ettles at brakkin barriers, offerin affordable, AI-driven hearin support tae bairns, aulder adults, an ither fowk.
E resairchers are developin a warkin prototype an engagin wi hearin aid companies tae explore future pairtnerships. Thay are also gaitherin real-warld noise samples tae impruive the system’s trainin.
Professor Sellathurai added: “There are ainly a few big companies aat mak hearin aids, an thay hae limited support in noisy environments. We waant tae brak aat barrier an help mair fowk access affordable, AI-driven hearin support.”
E COG-MHEAR team includes experts fae universities ower e UK, warkin tae a device aat cuid benefit nae ainly fowk wi hearin impairments but onybody warkin in noisy settins sic as ile rigs or hospitals.
2 responses to “Resairchers Develop ‘Hearin Glesses’ for tae Transform Soond Experience for Fowk wi Hearin Loss”
Sounds affae guid! Bit foo mich arr I glesses?
Am.profoundly deef bit hiv à roger microphone n twa heering aids. Ah dinnae like geein the microphone the à spikker. It’s m’a problem nae theirs!
This looks gran.
Thank you.
Georgia Stuart
Monythanks for yer kin words – I dinna hink they’re on e mercat yet, but wi foo fast aa iss AI assisted technology is gaan I wid howp it cuid be a free app tae integrate wi smart glesses (fit ye cin buy noo) an headphones or Bluetooth enabled hearin aids.