Scotland is increasin its efforts tae help polis an dug wardens manage dangerous an uncontrolled dogs. E Scottish Government annoonced iss plan at e Responsible Dug Awnership Summit last September.

E polis an dug wardens will get near £200,000 in fundin. Polis Scotland received £166,000 tae train its officers tae recognise banned breeds. Iss siller will help buy new, specially equipped vans tae safely transport dugs aat are oot o control. E National Dug Warden Association (NDWA) got £30,000 tae train wardens aat wark wi local communities. Community Safety Minister Siobhian Brown said, “Maist dug ainers are responsible. Fooivver, we maun protect e public fae dugs aat micht pose a danger. E fundin for Polis Scotland an e NDWA will help us control dangerous dugs an improve public safety. E NDWA trainin fund will help dug wardens promote responsible awnership, advise on dug weelfare, an mak siccar fowk follae the laa. I thank aabody aat jyned e Responsible Dug Aneership Summit an leuk forrit tae warkin thegither tae mak dug safety even better.”

Jim Ferguson, Chair o the NDWA, added, “We are prood tae wark wi the Scottish Government. Oor organisation represents local authority dug wardens throuoot Scotland. We walcome the recommendations fae the summit report. Biggin on its progress, we will continue tae review existin policies an leuk for mair weys tae protect fowk an their pets.”

E summit report shaws clear staps for improvin public safety an promotin gweed pet care. Scottish authorities will monitor dug control issues an keep leukin for better weys tae protect communities an their fower-legged freends.